Esta ruta non está homologada e a súa sinalización pode ser deficiente nalgúns tramos, polo que é recomendable o emprego de cartografía ou GPS para realizala.
Esta ruta parte da localidade de Folgoso do Courel e ascende o Monte do Coto e as ladeiras do Pía Paxaro (Campo do Seixo) percorrendo o val do Rego de Carballido. Este río forma un canón con gran cantidade de fervenzas e saltos de auga no que se practica o barranquismo. Fai miles de anos esta zona era un extenso glaciar que foi desaparecendo, deixando importantes pegadas no relevo: O Rego de Carballido, morrenas e depósitos glaciais, fervenzas…